Orð fyrir árið 2012 - Samantekt Árni Þórðarson, janúar 2012

Trúað til lífs, það rætist sem Guð hefur talað

1.    Orð trúar gefur líf og gegnumbrot

Árið 2011 var ár spámannsins, árið 2012 er ár postulans. Ég sé hvernig þessi tvö ár tengjast sterkt í því samhengi hvað Guð hefur nú þegar sýnt okkur og er að gera. Þessi tvö ár hafa með tenginu að gera (grundvöll húss Guðs) og þar er áherslan sem Guð er með núna að við tengjumst hvort öðru sem hans bygging og líkami (fjölskylda). Það sem Guð hefur lagt í okkur og eða talað til okkar og við höfum ekki vitað hvernig við ættum að framkvæma það eða ekki getað framkvæmt ein og sér mun Guð byrja að gefa okkur náð til að framkvæma á þessu ári. Hið postullega hefur mikið með það að gera að tengjast hvort öðru og starfa saman sem ein fjölskylda með hag Guðsríkisins fyrir brjósti.  það sem okkur var gefið sem eins og ómótað efni 2011 mun Guð móta þetta árið og setja í réttar skorður. Guð mun kunngjöra okkur hluti sem við höfum ekki áður þekkt og opinbera sýna dýrð (Jeremía 33:3).

Talan 11 er tala spámannsins, (getur haft með óreyðu eða rugling að gera), tala umskipta, að fara áfram og að vakna upp. Guð er að gera umskipti að við förum frá ellefu (rugling, ekki ósvipað og er Ísraelsmenn voru í herleiðingu í Babylon í 70 ár) yfir í töluna tólf sem hefur með stjórn Guðs að gera og postullega reglu/tilskipun að gera (Kanasland). Guð er að leiða okkur á hærra undir sinn höfðingjadóm (sáttmálsörkin/dýrðin) og því fylgir meiri postulleg smurning og gegnumbrot er við lútum vilja Guðs. Áður en ég fer nánar í þetta þá ætla að byrja á því að rifja lítillega upp sem Guð talaði til okkar á síðasta ári.

Guð talaði sterkt til okkar á allan hátt og hefur verið að vekja fólk upp eins og er hann vakti Lasarus upp af svefni. Við fundum að við þyrftum að taka stöðu okkar og vera það fólk sem stendur i skarðinu að biðja og kalla inn fólk frá andlegum dauða og til hafa áhrif að brostnir draumar og væntingar myndu glæðast á ný. Það sem Guð hefur talað áður inn í líf okkar og hefur ekki orðið að veruleika, verður núna að veruleika (Jóhannes 11:11). Þetta var ár annað tækifæris að koma aftur til Guðs og fá brostna drauma sína og væntingar og þau fyrirheit sem Guð hefur gefið og þau spádómsorð sem yfir okkur hafa verið töluð uppfyllt og fá það til baka sem hefur glatast (Jesaja 11:11).

Í byrjun ársins 2011 talaði Guð greinilega til okkar að tími væri fyrir það núna að byrja að kenna um hlutverk Postula og Spámanna í kirkjunni og þjóðfélaginu. Þetta eru þær dyr sem Guð hefur opnað.  Guð er að gefa mér opinberanir á því sem ég þekkti ekki áður. Guð sýndi mér í draumi hvernig hann reisti upp fimmföldu þjónustuna þannig að þær mynduðu dyr eða og brú, frá því gamla yfir í það nýja sem hann er að gera. Að fara frá forstöðumanna húsi yfir í postullegt hús. Húsi Sáls yfir í hús Davíðs, gamall og nýr vínbelgur. Ég hef einnig tekið eftir því að Guð er að tala það sama til margra og er aðrir tala það sem Guð hefur sýnt þeim þá er það í samhljómi og kemur sem staðfesting. Þetta eykur flæðið mikið og flýtir fyrir framgangi, hraðar verkinu. Þess vegna vill Guð að við tengjumst og störfum saman sem ein fjölskylda (Sálmur 133).

Guð talaði til okkar að vakningin væri byrjuð eins og árnar sem renna undan þröskuldinum í Esíkel 47 kafla. Fyrsta áin er byrjuð að flæða í ökla og hefur með fúsleika okkar að gera. Vinir, leyfum Guði að þvo skömm okkar og synd að við þjónum hans réttlæti í fúsleika, að við fullnægju öllu réttlæti eins og Jóhannes skírari þegar hann skírði Jesús. Við erum meira en verðug til að gera vilja Guðs vegna réttlæti Guðs í Kristi Jesú, hættum að vera bara þiggjendur, lægjum okkur undir höfðingjadóm Guðs og leyfum honum að flæða í gegnum okkur.

Kolbeinn Sigurðsson kom með orð fyrir þetta ár að það væru dyr sem við þyrftum að fara inn um, ég hvet ykkur sem hafið ekki heyrt hvað hann hefur sagt að lesa greinarnar hérna.

Til þess að fara inn um þessar dyr þurfum við að stíga yfir þröskuldinn. Við stöndum með tærnar við þennan þröskuld þar sem árnar flæða undan.  Guð hefur opnað víðar og verkmiklar dyr en andstæðingarnir eru margir (1 Korintubréf 16:9). Þetta hefst ekki baráttulaust, við þurfum að berjast í gegn til að fara yfir þennan þröskuld, því að óvinur sálna okkar vill ekki að við förum lengra.

Esekíel 10:4

Þá hófst dýrð Drottins upp frá kerúbunum og færði sig yfir á þröskuld hússins. Skýið fyllti húsið og ljómi frá dýrð Drottins fyllti forgarðinn.

Við þurfum að stíga yfir þennan þröskuld inn í dýrð Guðs, það má segja það að við stöndum núna í ljóma dýrðar hans í forgarðinum. Þetta er árið sem Guð vill opinbera sína dýrð meira en áður. Megi Guð gefa okkur öllum náð til að taka þetta skref auðmýktar.

Jesaja 6:1-8

Árið sem Ússía konungur andaðist sá ég Drottin sitjandi á háum og gnæfandi veldistóli, og slóði skikkju hans fyllti helgidóminn. 2Umhverfis hann stóðu serafar. Hafði hver þeirra sex vængi. Með tveimur huldu þeir ásjónur sínar, með tveimur huldu þeir fætur sína og með tveimur flugu þeir. 3Og þeir kölluðu hver til annars og sögðu: Heilagur, heilagur, heilagur er Drottinn allsherjar, öll jörðin er full af hans dýrð. 4Við raust þeirra, er þeir kölluðu, skulfu undirstöður þröskuldanna og húsið varð fullt af reyk. 5Þá sagði ég: Vei mér, það er úti um mig! Því að ég er maður, sem hefi óhreinar varir og bý meðal fólks, sem hefir óhreinar varir, því að augu mín hafa séð konunginn, Drottin allsherjar. 6Einn serafanna flaug þá til mín. Hann hélt á glóandi koli, sem hann hafði tekið af altarinu með töng, 7og hann snart munn minn með kolinu og sagði: Sjá, þetta hefir snortið varir þínar. Misgjörð þín er burt tekin og friðþægt er fyrir synd þína. 8Þá heyrði ég raust Drottins. Hann sagði: Hvern skal ég senda? Hver vill vera erindreki vor? Og ég sagði: Hér er ég, send þú mig!

Þessi vers þau segja svo margt, kröftug vers, dýrð sé Guði.

Þrátt fyrir að við séum syndug,  þá erum við réttlætt í honum. Guð  hefur verið að verka í okkur að vilja og framkvæma sér til velþóknunnar núna er kominn tími til að fara af stað.  Við vitum að orðið postuli þýðir að vera sendur. Þegar við segjum hér er ég, send þú mig og við förum síðan af stað í hans nafni,  þá kemur postulleg smurning yfir okkur, það er einmitt þetta sem þeir munu fá að reyna ríkulega á þessu ári sem halda sig við Drottinn. Við erum ekki ein í baráttunni, dýrðaraugu Drottins hvarfla til og frá og hann mun sýna sig máttugan á þessu ári með úthellingu dýrðar yfir sitt hús. Seinni dýrð hússins mun verða meiri en sú fyrri. Þeir sem hafa staðið fyrir utan hafa ekki haft hingað til mikið álit á okkur en það mun breytast er við upplifum á ný postulasöguna í hnotskurn og tökum fyrstu skrefin inn í endatíma vakninguna.

Undirstöður þröskuldana skulfu og húsið varð fullt af reyk. Þegar Guð vill opinbera sýna dýrð þá reynir á undirstöðurnar. Hvernig er undirstaðan í okkar lífi?  Höfum við byggt á réttum grunni? Það hristist allt sem hægt er að hrista því Guð vill opinbera sína dýrð. Við getum eignast mismunandi dýrðarliti Guðs í gegnum mismunandi reynslur sem við förum í gegnum. Þrenging vor er skammvinn en hún aflar oss eilífrar dýrðar sem stórum yfirgnæfir allt.  Þetta er árið sem Guð mun opinbera sína dýrð, dýrð Guðs mun færa okkur langþráð gegnumbrot.  Dýrð Guðs var  yfir sáttmálsörkinni í Tjaldbúð Móse, þar voru englar. Sáttmáls örkin er mynd upp á höfðingjadóm Guðs, postullegt skipulag.

Þegar Guð gefur fyrirheit, spádómsorð þá virðist stundum eins og andstæða þeirra komi upp, gott dæmi um þetta er líf Jósefs og Davíðs. Við getum treyst því að Guð gerir ekki mistök.

Jeremía 33:3

Kalla þú á mig og mun ég svara þér og kunngjöra þér mikla hluti og óskiljanlega, er þú hefir eigi þekkt.

Er við fáum spádómsorð þá eru þau eins og sæði trúar sem er gróðursett í okkur til að hjálpa okkur að vaxa og dafna í hans hjálpræði. Spádómsorð eru til þess að glæða trúarlíf okkar (huggun, hvatning, uppbygging) og til þess að hjálpa okkur að fara rétta leið lengra. Allt of margir bíða eftir því að spádómsorðin rætist af sjálfu sér og eða að Guð geri allt fyrir okkur. Þetta virkar ekki þannig. Spádómsorðin eru sæði trúar sem þarf að rækta og eða er eins og þegar getnaður á sér stað í móðurlífi og síðan hefst meðgangan þar til fæðing á sér stað (orðið kemst í uppfyllingu). Á meðgöngunni þarf að hlúa að fóstrinu, móðirinn þarf að gæta þess að nærast rétt og gera ekkert sem gæti skaðað fóstrið á meðgöngunni. Biðjum og tölum út spádómsorðin. Ef þú hefur fengið orð um að gera eitthvað eins og til dæmis prédika, byrjaðu þá að undirbúa þig með því að lesa orðið og biðja fyrir því og skrifa niður prédikanir.

Habbakuk 2:1-3

Ég ætla að nema staðar á varðbergi mínu og ganga út á virkisvegginn og skyggnast um til þess að sjá, hvað hann talar við mig og hverju hann svarar umkvartan minni.

2Þá svaraði Drottinn mér og sagði: Skrifa þú vitrunina upp og letra svo skýrt á spjöldin, að lesa megi viðstöðulaust.

3Því að enn hefir vitrunin sinn ákveðna tíma, en hún skundar að takmarkinu og bregst ekki. Þótt hún dragist, þá vænt hennar, því að hún mun vissulega fram kom

Það er nauðsynlegt að skrifa vitranirnar niður. Við sjáum einnig að Guð talaði við hann og hann við Guð. Vitrunin hefur sinn ákveðna tíma og skundar að markinu þar til hún rætist. Það eru margir sem átta sig ekki á því að það er hægt að rýna aftur og aftur í sýnirnar og draumana eða vitranirnar sem Guð hefur gefið til að fá meira og sjá meiri smáatriði. Eftir því sem nær dregur koma fleiri molar og púslur í myndina, staðfestingar þar til hún nær takmarkinu og rætist algjörlega.

1 Korintubréf 13:9-10

Því að þekking vor er í molum og spádómur vor er í molum.

10En þegar hið fullkomna kemur, þá líður það undir lok, sem er í molum.

Trúum við orði Guðs og því sem hefur verið talað inn í líf okkar þó að það sé enn ómótað? Þegar við trúum því og varðveitum það þá verður það okkur til lífs þrátt fyrir mótlæti og við höldum áfram í trú án þess að gefast upp uns það rætist til fulls.

2.   Grundvöllur byggingarinnar.

Efesusarbréfið 2:20-22

Þér eruð bygging, sem hefur að grundvelli postulana og spámennina, en Krist Jesú sjálfan að hyrningarsteini.

21Í honum er öll byggingin samantengd og vex svo, að hún verður heilagt musteri í Drottni.

22Í honum verðið þér líka bústaður handa Guði fyrir anda hans.

Biblían er öll skrifuð af spámönnum og postulum, þeir eru grundvöllur byggingarinnar. Byggingin er öll samantengd og vex, svo að hún verði heilagt musteri í Drottni. Guð vill að við séum tengd saman og vöxum í honum til að verða heilög brúður hans. Árið 2013 verður ár brúðarinnar.

Guð er að tala í gegnum nánast allt þessa dagana. Guð hefur gefið okkur fyrirheit, hann hefur talað í gegnum orð sitt og fyrir anda sinn og í gegnum sýnir og drauma og kringumstæður. Hann hefur sýnt okkur á einn eða annan hátt hver hans vilji er og hvað okkur ber að gera. Við vitum flest öll hvað okkur ber að gjöra, en kannski minna hvernig við eigum að koma því í framkvæmd. Á þessu ári mun Guð taka meira yfir en áður og sýna okkur hvernig við eigum að framkvæma hlutina.

Guð umbar meira hérna áður það sem við gerðum eða gerðum ekki, en núna hefur orðið breyting á því. Það sem við eins og komumst meira upp með hérna áður verðum við núna að fara að leggja til hliðar ef við ætlum að gera allan vilja Guðs og vaxa til að verða heilög brúður hans. Ég sá árið 2008 þessi umskipti verða, þá voru 60 ár frá stofnun Ísraelsríkis og ég sá eins og 10 ára ferli frá 2008 er Guð mundi byrja að undirbúa endurreisn og koma með flæði vakningar sem myndi ná yfirflæði á 10 árum ef honum myndi dvelja (Mattheus 24 kafli og fyrstu versin í kafla 25).  Árið 2018 verður Ísrael 70 ára, en talan 70 er bókstafurinn Aí á hebresku sem þýðir auga, uppspretta, dyr, endurreisn. 

Guð hefur verið að koma með breytingar og hafa allir fundið fyrir því, þó svo að þær hafa virst vera óljósar til að byrja með en núna munu þær verða enn greinilegri. Guð hefur síðan 2008 verið að hægja á öllu svo að við missum ekki af. Það var kominn svo mikill hraði í allt, allir á fullu, og allt á fleygiferð og mikil hætta á að illa færi. Margt fékk að grassera, spilling og óheiðarleiki. Guð hefur tekið á þessu, það hefur átt sér stað hreinsun. Vötn Guðs þau koma bæði með dóm og blessun allt eftir því hvernig við bregðumst við, þannig verður endanleg útkoma. Það má líkja þessu við flugvél sem er á miklum hraða og vegna hraðans þá er hætt við því að hún fljúgi af leið, missi af réttum ákvörðunnarstað. Einnig þarf hún að hægja á ferðinni er hún kemur inn til lendingar, ef ekki þá er hætta á því að hún brotlendi. Guð hefur verið að hægja á öllu til að ná athygli okkar, vekja okkur upp til meðvitundar um það sem skiptir máli, eru það veraldlegir hlutir eða andlegir hlutir? Að við metum gildi hlutana upp á nýtt. Við getum ekki komið með breytingar í eigin mætti, heldur Guð einn. Hann ætlast heldur ekki til þes að við breytum hlutunum í eigin mætti, heldur að við komum til hans. Hann hefur verið að draga okkur nær sér, vekja upp þá þörf hjá okkur að koma til hans eins og í byrjun er við fyrst frelsuðumst. Vekja upp okkar fyrsta kærleika.

Guð er að reisa upp spámenn og postula núna til þess að hraða verkinu og hjálpa okkur til þess að fara lengra. Þessar þjónustur gegna lykil hlutverki á endatímanum, þær þurfa að tengjast hinum þjónustunum (trúboðanum, hirðinum, kennaranum) og starfa með þeim, til að fullkomna hina heilögu og láta þeim þjónustu í té, líkama Krists til uppbyggingar, 13þangað til vér verðum allir einhuga í trúnni og þekkingunni á syni Guðs, verðum fullþroska og náum vaxtartakmarki Krists fyllingar (Efesus 4 kafli).

2.    Postullegt hús

Við þurfum góðan grundvöll til að hafa trausta byggingu. Guð er búinn að leggja grunninn, það er núna okkar að tengjast hvort öðru og starfa saman í honum til að framkvæma þau verk sem við erum smíðuð til að gjöra (Efesusarbréfið 2:10).

Árið 2012 er ár postulans. Talan 12 er tala höfðingjadóms Guðs og hefur með 12 stjórnunnar nöfn Drottins að gera, einnig er hún tala postulans. Postulinn er höfuð líkamans, sem kemur hreyfingu á allan líkaman. Anton sagði fyrir þetta ár að Guð væri að tengja saman fólk eins og talan 12 er saman sett af tölumum 6 + 6, talan 6 er tala manns.

Áhersla Guðs er núna á þessu ári meira en nokkru sinni fyrr að við vinnum saman með hag Guðsríkisins fyrir brjósti. Að söfnuðirnir og einstaklingar innan safnaðana tengist saman til að vinna sameiginlega að mismunandi verkefnum með hag Guðsríkisins fyrir brjósti.

Ég sá fyrir þetta ár hvernig svo margir vita ekki hvernig þeir eiga að koma því í framkvæmd sem Guð hefur sett í þá að gjöra, og eða hefur verið talað inn í líf þeirra. Ég sá hvernig fólk í mismunandi söfnuðum voru með mola/púslur í höndunum og voru að reyna að raða þeim saman en það gekk ekki, þar sem fólkið eitt og sér var ekki með allar púslurnar til að raða saman til að fá heildarmynd Guðs. Ég sá hvernig Guð vildi að við tengdumst meira saman til að starfa saman og það vitnar með því sem að Anton talaði út. Ég sá að það var ekki fyrr en að fólkið tengdist hvort öðru og fór að starfa saman að púslurnar röðuðust saman og þá vissi fólkið hvernig ætti að framkvæma það sem Guð hafði lagt á hjörtu þeirra að gera.

Hið postullega hefur mikið með það að gera að við störfum saman þó svo að við séum ólík og með mismunandi skoðanir. Hættum að gagnrýna hvort annað eða það sem verið er að gera í veikleika, hlaupum frekar í skarðið og hjálpum til með það sem verið er að gera þó svo að það sé gjört í veikleika og eða ekki algjörlega eftir okkar höfði og eða unnið af fólki í öðrum söfnuði. Störfum meira saman að trúboði og höfum sameiginlegar bæna og lofgjörðarstundir í tíma og ótíma og við munum sjá postullega smurningu koma yfir kirkjuna sem aldrei fyrr, með öllu því sem að henni fylgir. Lækningum, kraftaverkum, táknum og undrum.

Ef einhver ritningarvers lýsa í stuttu máli hvað hið postullega stendur fyrir þá er það versin í postulasögunni 26 kafla 17-18 Ég mun frelsa þig frá lýðnum og frá heiðingjunum, og til þeirra sendi ég þig 18að opna augu þeirra og snúa þeim frá myrkri til ljóss, frá Satans valdi til Guðs, svo að þeir öðlist fyrir trú á mig fyrirgefningu syndanna og arf með þeim, sem helgaðir eru.

Postularnir hafa undursamlegan skilning á leyndardómum Guðs og munu miðla okkur af þeim visku brunni. Á þessu ári munum við sjá gegnumbrot og vígi óvinarins tekinn niður og fólki mun verða snúið frá myrkri til ljóss frá Satans valdi til Guðs.

Á þessari stundu, þessu ári 2012 mitt í allri ringulreiðinni sem hefur ríkt þá er Guð að taka yfir með sinn postullega höfðingjadóm. Guð mun núna taka yfir með sitt skipulag sem kemur reglu á alla ringulreiðuna. Hann reisir núna upp fólk sem sína rödd, mitt í allri ringulreiðunni sem sér eins og hann sér og mun færa fram gegnumbrot. Hann mun tengja okkur saman sem eina fjölskyldu og það mun færa það fram sem við höfum lengi þráð,  fólk mun taka eftir því og koma til Drottins. Ég veit ekki hvernig Guð gerir þetta, en þetta er það sem ég sé að hann ætlar að gera. Fólk sem hefur snerst af Guði en hefur ekki fengið almennilega lausn mun losna úr fjötrum og mun flæða í bæn og lofgjörð til Guðs.  Guð hefur eins og hingað til verið að þjóna til okkar, núna mun verða breyting á, hann mun byrja að þjóna, flæða í gegnum okkur sem aldrei fyrr. Þau höft sem hafa verið munu bresta.  Dýrðin hefur mikil áhrif og breytir okkur.

Aukning verður á því að  fólk fari út á við í trúboð á þessu ári, akrarnir eru hvítir og við munum sjá verkamenn fara af stað og taka inn uppskeruna. Englar Guðs eru farnir af stað núna til að taka inn uppskeruna með okkur. Við munum sjá miklu stærri lækningar og kraftaverk en áður og meiri hreyfingu komast á hlutina. Ég trúi því að endatíma vakningin sé byrjuð.  Ég trúi því að á næstu tíu árum ef Guð dvelur munum við sjá fleiri sálir frelsast en síðast liðin 2.000 ár.

Það kom til mín að ég ætti að taka stein og mola hann með hamri til tákns um það sem Guð ætlar að gera á þessu ári. Steinninn er mynd af vígi Satans og hamarinn er orð Guðs. Guð mun brjóta niður óvinnanleg vígi á þessu ári.  Seinni dýrð hússins mun verða meiri en sú fyrri. Dýrð Guðs hefur mikil áhrif og breytir öllu.

Við höfum verið eins og ungar sem koma út úr eggi, núna munum við fá styrk í vængina til að fljúga upp sem ernir á þessu ári nær dýrðinni.

4.    Breytingar, fólk fært til í embættum, úr og í stöður.

Höfðingjadómur Guðs (dýrð) og hið postullega knýr fram breytingar, byltingu!

Á gamlársnótt dreymdi mig draum. Vörður og Ester, forstöðu hjón Hvítasunnusafnaðarins í Reykjavík voru í draumnum. Það kom til mín að nöfnin þeirra væru táknræn fyrir það sem Guð er að gera núna fyrir þetta ár á Íslandi.  Andlega talað Vörður sem varðmaður (ekki bara spámaður, heldur einnig sem sjáandi) og Ester sem brúður.

Ég dreymdi að ég var staddur á Akureyri á samkomu hjá Hvítasunnusöfnuðinum, Vörður og Ester voru forstöðuhjón þar. Guð talaði mjög margt til mín í gegnum drauminn. Það sem ég upplifði í draumnum var í rauninni atvik sem gerðist í alvörunni fyrir mörgum árum síðan er ég var ég á samkomu hjá Hvítasunnusöfnuðinum á Akureyri ásamt Guðmundi Haraldssyni. Við vorum á þeim tíma í sölu og trúboðsferð fyrir Áfanga heimili Krossins.  Á þessari samkomu þá sá ég í sýn fína línu á milli mín og þess manns sem var að gefa vitnisburð í púltinu og Esterar konu Varðar (ég man ekki alveg hver maðurinn var en minnir að hann heiti Arnþór, hann bjó þá á Ísafyrði).  Hvað um það alla veganna þá sé ég þessa tengingu á milli okkar þriggja, ég sat aftast á samkomunni. Ég fann  kraft Guðs og smurningu koma yfir mig og rísa upp innra með mér og fann að ég átti að koma með tungutal sem Ester myndi síðan útleggja sem spádóms orð inn í líf þessa manns (ég hafði opinberun á því hvers eðlis orðin væru).  Ég fann þó þessa baráttu sem maður finnur nær alltaf er maður þarf að stíga svona fram.

Ég labba síðan af stað í áttina að manninum er hann kemur niður úr púltinu og Ester labbar að honum líka og ég tala út tungutalið og Ester útleggur síðan tungutalið. Orðið var á þessa leið að Guð myndi koma með breytingar á högum þessa manns og að hann myndi flytja frá Ísafyrði til Akureyrar og fara þar í þjónustu sem að gerðist. Á þessu sama augnabliki í draumnum þá sé ég líka þá breytingu sem varð er Vörður og Ester fluttu til Reykjavíkur og tóku við þar sem forstöðu hjón. Í draumnum upplifði ég það að ég var að spá, ekki í fortíðinni á samkomunni á Akureyri, heldur það sem Guð er að sýna mér núna og ég er að segja frá.  Ég upplifði það að ég væri að spá því sem Guð er að sýna mér fyrir þetta ár. Ég vissi að ég ætti að tala það út sem Guð sýndi mér og er að sýna mér.

Ég heyrði Guð segja; það eru breytingar, ég er að gera breytingar. Það mun verða  breytingar fólk mun verða flutt til í embættum og úr og í stöður ekki bara í kirkjunum heldur í þjóðfélaginu öllu (alveg eins og kom fram táknrænt í draumnum).

Ég sá einnig Esterarbók í hnotskurn hvernig Ester sem óþekkt persóna var reyst upp sem drottning og brúður og var í höndum Guðs sem verkfæri að bjarga þjóð sinni úr glötun. Ég heyrði allan tíman lagið hljóma með Halldóri Þorvaldssyni, Guð elskar alla menn án skilyrða. Það sem kom svo skýrt fram var hvernig öllum er boðið í brúðkaup lambsins, enginn undanskilinn. Hverjir munu bregðast við því kalli?  Ég sé hvernig Guð mun reisa upp réttlæti á þessu ári í þjóðfélaginu okkar, ekki ósvipað og gerðist á dögum Esterar, hvernig fólk mun rísa upp, venjulegt fólk og segja hingað og ekki lengra.  Það kom einnig til mín að stórt VEI kæmi yfir þá sem héldu áfram að þjóna spillingu og ranglæti að kúga og hafa af náunganum (Jesaja 5:8).  

Árið 2008 talaði Guð til mín meðal annars það að hann myndi tala í gegnum nánast allt, þar sem hann væri að starfa og vinna undirbúningsvinnuna, og jafnvel þar á meðal í gegnum bíó myndir. Ég sá eitt kvöldið núna í síðustu viku að það var verið að sýna Bíó mynd um Esterarbók, á Stöð tvö af öllum stöðvum.  þetta kom sem enn ein staðfestingin til mín. Það merkilega við þetta er það að ég heyrði Vörð tala á bænasamkomu í Fíladelfíu 8. janúar á þessu ári. Vörður talaði nákvæmlega um þetta sama, að það hafi komið til sín að það verði breytingar á mörgu en þó sérstaklega á því að fólk mun verða flutt til í embættum, úr og í stöður.

Ég dreymdi annan draum fyrir þetta ár, ég dreymdi það að við vorum nokkur saman að biðja fyrir manni sem var dáinn. Ég lagði hendurnar á hjarta mannsins í draumnum og það kom blossi og maðurinn tók kipp er hann lifnaði við. Ég sagði Connie Ellertsson þennan draum í samhengi með því að ég  bjóst alveg við því að Guð myndi gera kraftaverk er við báðum fyrir Óskari Páli rétt áður en hann kvaddi þennan heim.

Connie Ellertsson sagði að þessi draumur væri mynd upp á það að Guð væri að vekja upp líkama sinn, brúði sína. Að í gegnum þessa erfiðu reynslu við frá fall Óskars þá væri Guð að starfa í hjörtum fólks. Að dýrð Guðs muni opinberast í gegnum þessa sársauka fullu reynslu.

Ég er þess fullviss að í stað þess að við höfum misst Óskar Pál frá okkur að þá muni Guð gefa það margfalt til baka á annan hátt.  Ég trúi því að það sem var á hjarta Óskar Páls, það sem hann þráði að sjá sem framgang í Guðsríkinu muni gerast, að margar sálir muni koma til Drottins. Eitt af þeim spádómsorðum sem ég man að Óskar Páll fékk eru þau að hann er frumgróði unga fólksins fyrir vakningu.

Það er bæn mín að þessi orð hjálpi þér á göngunni með Guði,

Árni Þórðarson